Cadde Muuse madaalay mise, nin weyni wadkii waa yaqaan?
Madex waynahay dowlad goboleedka Puntlaand ayaa maanta ka hadlay
arimo badan o khuseeya Puntland iyo xaalka ay maanta ku sugan tahay.
Waxyaabihii uu ka hadlay Cadde Muuse ayaa waxaa ka mid ahayd in
Cadde uuna dib ugu tartamayn xilka uu maanta hayo ee ah hogaaminta
dowlad goboleedka Puntland. Cadde ayaa sheegay in marka xilku ka
dhamaado ee Janaayo 8, 2009 uu xilka ka degayo una tartamayn
mar kale isagoo yidhi waan daalay oo waan iska nasanayaa.
Su'aasha meesha taala ayaa waxay tahay, Cadde ma run baa oo wuu
daalay, mise nin weyni wedkii waa yaqaanaaye, wuxuu dareemay
rajada laga qabo in dib loogu doorto jagadda uu hayay, oo mudadii uu
xilka maamul goboleedkaasi uu hayay dib u dhac weyni ku dhacay?
Maamulka Cadde waxaa lagu xusuusan doonaa, musuq maasuq ay sabab
u yihiin dhamaan nimanka maamulka la daadihiya ha ugu darnaadeen isaga
iyo ninka ku xigeenka u ah ee Afqudhac, iyo wasiiradiisa oo aan ahayn kuwo
ama aan awood madax banaani lahayn, ama u jooga sidii aay naftooda uga
qancin lahaayeen xilalka ay hayaan. Waxaa kale oo maamulka Cadde ku
caan baxay daabicista lacagta beenta ah, taas oo uu u soo iibsaday makiinado
u sameeya lacagtaa. Waxaa kale oo wax qabadkiisii ka mid ah, awood dari
iyo maamul xumo sababtay in magaaladda Laas Caanood ay u gacan gasho
maamulka Soomaali diidka ah ee Hargaysa iyo wax ka qabad la'aantiisii
qabsashadda ka dib. Waxaa kaloo lagu xusuusan doonaa, fool xumaddii
beryihii ugu danbaysay ka dhacday Gaal Kacyo ee ahayd in dad Soomaali
ah loo gacan geliyo taliska Xabashida, si loogu tartamo raali galinta Meles
oo tartan dhex dhigay maamuladda Puntland iyo Somaliland taas oo uu ku
tijaabinayo daacadnimadda ay maamuladaasi u hayaan Meles.
Arinta kale ee Cadde lagu xusuusan doonaa waxaa ka mid ah, amaankii
Puntland oo gebi ahaanba gacanta ka baxay. Puntland oo noqotay meel
uu ka taliyo ninkii markaa qori haysta iyo Cadde oo aan ku dadaalin
haba yaraatee wax ka qabadka amaanka maamul goboleedkaa.
Cadde, waxaa imika u hadhay muddo todoba bilood ah, su'aasha meesha
taalaa waxaa weeye, Cadde muxuu qaban karaa mudadaa u hadhay si
uu u badbaadiyo taariikhda maamulka uu madaxda ka yahay? Way adag
tahay, in Cadde Muuse uu ku dhaqaaqo arin muhiim ah oo wax weyn ka
bedesha hab dhaqanka habacsan ee Puntland maanta ka jira, waxayna u
muuqataa inuu ku qanacsan yahay in maamulka uu ka dego iyadoo
Puntland ay dhaawac tahay balse ayna weli dhiig bixin, marka uu kursiga
ka boodana waxay u muuqataa wixii ka gadaal dhaca, inuu Cadde rabo
inuu yidhaahod "beri baan ka ahay." Hadaba, iyadoo rag badani ay u tafa
xaydanayaan hogaaminta Puntland, ayaa su'aasha meesha taalaa ay tahay
Puntland ma ka bad baadi doontaa dhaawaca halista ah ee Cadde iyo
Afqudhac ay u geysteen, mise waxay noqon doontaa mid aan ka soo
kaban khalkhalkaa galay oo dib ugu noqota jaah wareer iyo is qab qabsi kale?
Helista jawaabtaasi waxaa inagga xiga mudo ka yar todoba bilood!!
Abdi Xarbi